ايـه ده خـالـتـو وخـالـو ربـنـا يـسـتـر

السلام عليكم ورحمه الله وبركاته

دي التاجات تخيلو

اه سامعه حد بيقولي يااااااااااااه انتي لسه فاكره

طيب اقول ايه

معلش بقي المسامح كريم

كنت جاوبت علي تاخ خالتو ولقيت تاج الصباغ جاوبته لقيت تاج ابن حجر والباحث وتاج اختي امه الله طيب اعمل ايه قولت انزلهم علي مرتين

ماتخافوش الاجابات مش هتبقي طويله

تاج خالتو فرنسا

دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟

الدبابه

كنت تفضل الدخول مستقل او تتبع حزب معين ؟؟؟؟

مستقل

اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟

لا طبعا ايش جاب لجاب

الدبابه ياجماعه الدبابه ماتنسوش

ايه اول حاجه هتعملها لنفسك ولاسرتك ؟؟؟؟؟

هنشتري عصير قصب (علشان المقاطعه)و

ايه المشروع اللى ناوى تعمله لاهل دايرتك ؟؟؟؟دون ذكر اسم الدائره ان اردت

دار ايتام ودار مسنين في وقت واحد

يعني دار الايتام الاطفال اللي فيها بيبقي نفسهم يلاقو ناس تعتبرهم ولادهم بجدودار المسنيين بيحسو انهم بلا هدف فنديهم هدف يربو ويعتبرو الايتام دول ولادهم هتتحل المشكله وفي نفس الوقت الاخطاء اللي الاهالي اللي في دار المسنني عملوها مع ولادهم يتجنبوها مع دول وهتبقي عمليه انتفاعيه متبادله

وهشيل كل القهاوي من البلد نهائي والنت كافيه برده

الولاد اللي في الكي جي والابتدائي بيروحو النت كافيه ياعالم وبيهربو من المدرسه علشان يروحو يلعبو حاجه اسمها كونكر وتيبيا

ومش بيجيبو بمصروفهم اكل ولا اي حاجه من اللي كانت بتجذبنا واحنا صغيرين

قعدت فى المجلس جنب نائب مميز . من هو النائب ؟؟؟

ولا اي حد هقعد لوحدي:p

قدمت سؤال للحكومه ايه هو السؤال ؟؟؟؟؟

انتو هتقابلو ربنا ازاي

طلب احاطه موضوعه ايه ؟؟؟ وبتقدمه لمين ؟؟؟؟

هقدم طلب احاطه لايه ولا ايه حسبنا الله ونعم الوكيل

استجواب لاتنين من الوزراء موضوعه ايه ؟؟؟؟وبتستجوب مين ؟؟؟؟

وزير الصحه والتعليم

الاستجواب كله عباره عن كلمه ليــــــــــــــــــــــه

هل انت مع الخصخصه ؟؟؟؟؟؟

خصخصه هي فيه حاجه اسمها خصخصه اللي موجود مش خصخصه ومعروف هو ايه

هل انت مع قطع العلاقه مع اسرائيل ؟؟؟؟؟

طبعااا ونهائيا

هل تؤيد الحرب الحرب على العراق ؟؟؟؟؟؟؟؟

لا بالطبع

هل تؤيد مرور الامريكان فى القناه ؟؟؟؟؟؟

لا لا لا

هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟

لا طبعا

بس مين اصلا ام دبوه دي

بتمرر التاج ده لمين ؟؟؟؟؟؟؟؟

هو فيه حد لسه ماجاوبوش اصلا

عموما اللي مجاوبوش يتفضل يجاوبه

واولهم مستجده وانا انسان وميويه

::::::::::::::::::::::::::::::::::::::::::::::

تاج خـــالو الصباغ

هل توافق على حزف خانة الديانة من البطاقة الشخصية ؟

لا طبعا بتستخدم في حاجات كتيره جدا ..اما اللي بيقولو انها تتلغي علشان الاضطهاد الموجود فانا مش شايفه ان فيه اصلا مشكله من موضوع خانه الدينات دي

يعني لو حد ضربك في الشارع هتقوله استني لو سمحت طلعلي البطاقه اشوفك انت مسلم ولا مسيحي ..لا طبعا مش بيحصل كده ولو حد ضربك هتعجنه من غير ماتعرف هو ايه:)))و

ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟

المثليين عندهم مشاكل نفسيه .بلا وازع ديني . لم ينشؤا نشاه سويه - هذا مااراه -

لا لا اعترف بوجودهم وبشكل نهائي ومازلت اكرر المفروض انهم يتعرضوا علي دكاتره امراض نفسيه ويحدث معهم لقاءات مع رجال الدين

لا ولله الحمد ليس لي اصدقاء مثليين

هل تعتقد بوجود إضطهاد للمسيحين فى مصر ؟

لا طبعا مافيش بالعكس يمكن هما لو اتعرضوا لمشكله بيلاقو حد جنبهم(المسلمين والكنيسه والحكومه) علي عكس المسلمين

من هو الشخص الذى تختارة لرئاسة مصر

لو فيه شخص يتقي الله ويتصف بالاخلاق والامانه والذكاء والشجاعه هختاره فورا

أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم

حزب سياسي مره واحده لا ياعم انا ماليش دعوه بالحاجات دي دي مسئوليه انا مش قدها

اه اوافق علي مشاركه الاخوان

الاجابه بتاعتي في سؤال واحد

هل امريكا (اللي هي رمز الحريه في العالم -كما يزعمون-)و

تقبل ان تعطي حكم او رئاسه حزب لمسلم ؟!!!! وعليه فانا اقول

اوافق علي مشاركه الاقباط بشروط

فى رأيك الشخصى .. ما هى أفضل مدونة على بلوجر قمت بزيارتها ؟

كتير جدا

كل الموجودين ع الشمال

للإناث فقط : هل توافقين على الزواج من رجل مطلق ؟

ياالله ليه السؤال ده بقي

اولا اسال علي دينه وبعد كده علي اسباب الطلاق وبعد كده اروح لطليقته علشان اكون سمعت من الطرفين وبعد كده احكم واقرر

اذا تزوجت وأنجبت ولدين وبنتين .. أى الأسماء تحب أن تسمى

خديجه وعائشه

عمر ومحمود

هل تعتقد أن توريث الحكم فى مصر . . سيتم فعلا أم لا ؟

ياخبر النهارده بفلوس بكره يبقي ببلاش

ربنا يستر

فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

انجازات

المترو علشان السلالم المتحركه :)))و

والله مااعرف انجازات يمكن لاني اصلا ماشوفتش حاجه قبل كده اقارن بينها وبين دلوقتي

اسوأ

غلاء الاسعار والخصخصه

ثم لمن تمرر هذا التاج ؟

برده اعتقد ان مافاضلش حد ماجاوبوش غيري

همرره لمستجده ولعاشقه النقاب ولانا انسان وميويه وعبد الفتاح ودكتور بيطري وكل الموجودن عندي في المدونات المفضله عندي وماجاوبهوش